Localitads

Casa Caltgera

La Casa Caltgera ei ina casa da vacanzas, da recreaziun e da studi, baghegiada 1960, renovada ed engrondida 2006. Ella ei situada giudem il vitg da Laax, amiez in uaul da larischs e tieua.
Da 1969 tochen 1981 vegnan ils cuors da romontsch realisai a Rumein, ella Val Lumnezia. Per motivs da plaz vegnan els dislocai 1982 a Laax en Casa Caltgera. Las participontas ed ils participonts dil cuors anflan en quella casa dunsena ed albiert per in prezi commensurau. Tgi che fa diever dalla pusseivladad da magliar e star sur notg en Casa Caltgera, sa seprofitar grondamein e cuntinuadamein d'ina instrucziun prolunghida, quasi famigliara.

Ella Casa Caltgera vegnan per regla quater livels plazzai.

www.caltgera-laax.ch 
 

Ulteriuras localitads ordvart la Casa Caltgera

Nies Cuors romontsch ei carschius successivamein el decuors dils onns talmein che la Casa Caltgera po gia dapi plirs onns buca tschaffar pli tut ils livels. Aschia vegnan differents livels plazzai ordvart la CC, numnadamein el Center da lungatg, cultura e formaziun Surselva (egl anteriur Hotel Arena Alva giudem il vitg da Laax) ed ella Sentupada (edifeci dalla Pleiv da Laax che sesanfla sut la baselgia parochiala). Las occurrenzas da cuminonza sco il cant romontsch, l’introducziun el rg, il program accumpignont dalla sera – sco secapescha era las tschaveras – han liug el center dil cuors, ella Casa Caltgera.
 

Colligiaziun Casa Caltgera e las autras localitads

Per motivs da segirtad (traffic d'autos!) cussegliein nus ferventamein da buca prender la via principala per contonscher nossas autras localitads che sesanflan el vitg da Laax, mobein da prender la bellezia senda tras igl uaul ch'entscheiva gest davos la Casa Caltgera. Engraziel fetg!