Danis, ils 21 da november 2023
Communicaziun allas medias
Conradin Klaiss menader dalla Fundaziun Retoromana
Per calonda november ha il cussegl dalla Fundaziun Retoromana Pader Flurin Maissen (FRR) – presidiaus da Francestg Friberg – creau ina nova plazza da menader da fundaziun, ed eligiu Conradin Klaiss (47) en quei post.
Dapi igl onn 1999 fa Conradin Klaiss part dil team dil Cuors romontsch sursilvan intensiv dalla FFR, gl’emprem sco scolast da lungatg, pli tard sco menader operativ, e dapi il 2019 sco directur dil cuors. Sper quella funcziun vegn el da niev a luvrar per ulteriuras purschidas e per differents projects en favur dil romontsch. Denter auter vegn el a s’engaschar per ina publicaziun online dils dus vocabularis dalla FRR. Ei setracta dil vocabulari sursilvan-franzos e dil vocabulari franzos-sursilvan che Jean-Jacques Furer, commember dil cussegl da fundaziun dalla FRR, ha redigiu el decuors dils davos 40 onns.
Conradin Klaiss ei menader da scola diplomau e scolast secundar. El ha instruiu 12 onns e menau treis onns il Consorzi da scola Rueun e contuorn. Ultra da quei eis el staus 8 onns commember da direcziun e menader Formaziun tier la Lia Rumantscha.
Conradin Klaiss ei carschius si a Danis e habitescha dapi tschun onns a Küsnacht el cantun Turitg nua ch’el viva ensemen cun sia partenaria e lur fegl da treis onns. Sia lavur pil romontsch fa el per gronda part da casa anora.
La FRR ei vegnida creada igl onn 1982 e sortida digl «Institut de Cuors retoromontschs» staus fundaus igl onn 1969 da Pader Flurin Maissen e da siu frar Augustin Maissen a Rumein, cugl intent da «salvar, tgirar ed animar la cultura dils Romontschs ad ina veta emplenida da tut quei ch’ei human, bi e car, exequida en tutta libertad dils dretgs humans».
La FRR selegra grondamein da quella nova collaboraziun. Cun Conradin Klaiss ha la FRR gudignau ina persuna capavla e valenta per il niev post scaffiu, la quala ei garant per lavur professiunala e spirtusa en favur dalla «cultura e cultira romontscha», sco quei che Pader Flurin – igl anteriur parsura dalla fundaziun – haveva per moda da dir.
Per la Fundaziun Retoromana Pader Flurin Maissen
Francestg Friberg, president FRR
Revistas da pressa: